375 വോട്ടുകള്‍ എണ്ണിയില്ല ; പെരിന്തല്‍മണ്ണയിലെ എല്‍.ഡി.എഫ്​ സ്​ഥാനാര്‍ഥി നിയമ പോരാട്ടത്തിനൊരുങ്ങുന്നു 
 

 | 
375 വോട്ടുകള്‍ എണ്ണിയില്ല ; പെരിന്തല്‍മണ്ണയിലെ എല്‍.ഡി.എഫ്​ സ്​ഥാനാര്‍ഥി നിയമ പോരാട്ടത്തിനൊരുങ്ങുന്നു

മലപ്പുറം: 38 വോട്ടിന്​ യൂത്ത്​ ലീഗ്​ നേതാവ്​ നജീബ്​ കാന്തപുരത്തിനോട്​ അടിയറവ്​ പറഞ്ഞ പെരിന്തല്‍മണ്ണയിലെ എല്‍.ഡി.എഫ്​ സ്​ഥാനാര്‍ഥി കെ.പി. മുഹമ്മദ്​ മുസ്​തഫ നിയമപോരാട്ടത്തിന്​.

പ്രായമായവരുടെ വിഭാഗത്തില്‍പെട്ടുന്ന 375 വോട്ടുകള്‍ എണ്ണിയില്ലെന്ന പരാതിയുമായാണ്​ അദ്ദേഹം കോടതിയെ സമീപിക്കുന്നത്​. കവറിന്​ പുറത്ത്​ സീല്‍ ഇല്ലെന്നായിരുന്നു എണ്ണാതിരിക്കാനുള്ള ഉദ്യോഗസ്​ഥരുടെ വിശദീകരണം. സീല്‍ ചെയ്യേണ്ടത്​ തെരഞ്ഞെടുപ്പ്​ കമീഷന്‍റെ ഉദ്യോഗസ്​ഥരാണ്​. ഇവര്‍ മനഃപൂര്‍വം സീല്‍ ചെയ്യാതിരുന്നതാണോയെന്ന്​ സംശയമുണ്ടെന്നും മുസ്​തഫ ആരോപിക്കുന്നു.

അങ്ങേയറ്റം വാശിയേറിയ മത്സരത്തില്‍ അവസാനനിമിഷമാണ്​ മുസ്​തഫ പരാജയപ്പെടുന്നത്​. ഒരുഘട്ടത്തില്‍ എല്‍.ഡി.എഫ്​ സ്​ഥാനാര്‍ഥി വിജയിച്ചുവെന്ന പ്രചാരണം വരെ വന്നിരുന്നു.

2016ല്‍ മഞ്ഞളാംകുഴി അലിയും വി. ശശികുമാറും തമ്മില്‍ നടന്ന വീറും വാശിയും ഇത്തവണയും പെരിന്തല്‍മണ്ണയില്‍ ഉണ്ടായി. 2016ല്‍ 579 വോട്ടിനാണ് അലി വിജയിച്ചത്. ഇത്തവണ 2,17,959 വോട്ടാണ്​ മണ്ഡലത്തില്‍. 2016ലെ തെരഞ്ഞെടുപ്പിനെ അപേക്ഷിച്ച്‌ 11,393 വോട്ട് ഇത്തവണ അധികം പെട്ടിയില്‍ വീണിട്ടുണ്ട്. ഇത് അധികവും പുതിയ വോട്ടാണ്.