ഗൂഗിൾ ഇൻബോക്സിന് പിൻഗാമിയായി സ്പാ‍ര്‍ക്ക് വരുന്നു

ഗൂഗിൾ ഇൻബോക്സിന് പിൻഗാമിയായി സ്പാ‍ര്‍ക്ക് വരുന്നു

ഗൂഗിളിന്‍റെ ജിമെയിൽ അടിസ്ഥാനമായി പ്രവര്‍ത്തിക്കുന്ന ഇൻബോക്സ് ആപ്പ് പിൻവലിക്കുന്നതിനു പിന്നാലെ പകരക്കാരനായി സ്പാര്‍ക്ക് ആപ്പ് വരുമെന്ന് റിപ്പോര്‍ട്ട്. ഐഓഎസ് ആപ്പിലെ ജനപ്രിയ ഇമെയിൽ ആപ്ലിക്കേഷനായ സ്പാര്‍ക്ക് ആണ് ഇൻബോക്സിന്‍റെ ഇടം കൈയ്യടക്കാനായി ആൻഡ്രോയ്ഡ് ഉപകരണങ്ങളിലേയ്കക് വരുന്നത്. സ്പാര്‍ക്ക് ആൻഡ്രോയ്ഡിലേയ്ക്ക് വരുന്നതോടെ ജിമെയിൽ സേവനങ്ങള്‍ അടുക്കും ചിട്ടയോടും കൂടി തരംതിരിക്കാൻ ആൻഡ്രോയ്ഡ് ഉപഭോക്താക്കള്‍ക്ക് എളുപ്പമാകും. 

ഇമെയിൽ സേവനങ്ങള്‍ക്കായി പ്രവര്‍ത്തിച്ചിരുന്ന സ്പാര്‍ക്ക് ആപ്ലിക്കേഷൻ ഇതുവരെ ഐഓഎസ് ഉപകരണങ്ങളിൽ മാത്രമായിരുന്നു ലഭ്യമായിരുന്നത്. എന്നാൽ സ്പാര്‍ക്ക് ആൻഡ്രോയ്ഡിലേയ്ക്ക് എത്തുന്നതോടെ സ്മാര്‍ട്ട് നോട്ടിഫിക്കേഷനുകള്‍, സ്നൂസിങ്, സെന്‍ഡ് ലേറ്റര്‍, റിമൈൻഡര്‍, ക്വിക്ക് റിപ്ലൈ തുടങ്ങിയ നിരവധി ഉപകാരപ്രദമായ ഫീച്ചറുകള്‍ കൂടുതൽ ഉപഭോക്താക്കള്‍ക്ക് ലഭ്യമാകും. 

പേഴ്സണൽ,വര്‍ക്ക്, ന്യൂസ് ലെറ്റേഴ്സ് എന്നിങ്ങനെ ഇൻബോക്സിൽ വരുന്ന മെയിലുകള്‍ തരം തിരിക്കാനുള്ള സംവിധാനം സ്പാര്‍ക്കിലുണ്ട്. എന്നാൽ ആപ്പിള്‍ ഫോണുകളിൽ ലഭിക്കുന്ന എല്ലാ സംവിധാനങ്ങളും ആൻഡ്രോയ്ഡിൽ ലഭിച്ചേക്കില്ലെന്നും റിപ്പോര്‍ട്ടുകളുണ്ട്.