ഐഫോണ്‍ സാങ്കേതികവിദ്യ മോഷ്‍ടിച്ചു; പിഴ 31 ദശലക്ഷം ഡോളര്‍

ഐഫോണ്‍ സാങ്കേതികവിദ്യ മോഷ്‍ടിച്ചു; പിഴ 31 ദശലക്ഷം ഡോളര്‍

ഐഫോണ്‍ നിര്‍മ്മാതാക്കളായ ആപ്പിള്‍ കമ്പനിക്ക് എതിരെ അമേരിക്കന്‍ ഇലക്ട്രോണിക് ചിപ് നിര്‍മ്മാണക്കമ്പനി ക്വാല്‍കോമിന് കോടതിയില്‍ വിജയം. ക്വാല്‍കോം വികസിപ്പിച്ച മൂന്നു പേറ്റന്‍റുകള്‍ മോഷ്‍ടിച്ചതിന് ആപ്പിള്‍ 31 ദശലക്ഷം ഡോളര്‍ ക്വാല്‍കോമിന് നല്‍കണം എന്ന് അമേരിക്കയിലെ സാന്‍ ഡിയെഗോയിലെ ഫെഡറല്‍ കോടതി ഉത്തരവിട്ടു. 

മൊബൈല്‍ഫോണ്‍ ബാറ്ററികള്‍ക്ക് കൂടുതല്‍ ലൈഫ് നല്‍കുന്ന സാങ്കേതികവിദ്യയാണ് ക്വാല്‍കോമില്‍ നിന്ന് ആപ്പിള്‍ അനുമതിയില്ലാതെ ഉപയോഗിച്ചത്. ഈ സാങ്കേതികവിദ്യ പ്രയോജനപ്പെടുത്തി നിര്‍മ്മിച്ച ഓരോ ഐഫോണിനും 1.41 ഡോളര്‍ വീതം പിഴയായി ആപ്പിള്‍ നല്‍കണമെന്ന വാദം കോടതി അംഗീകരിക്കുകയായിരുന്നു. 

രണ്ടു കമ്പനികളും തമ്മിലുള്ള നിയമയുദ്ധം തുടങ്ങിയിട്ട് രണ്ട് വര്‍ഷങ്ങളായി. ഇതില്‍ ഏറ്റവും വലുത് 2017 ആദ്യം ആപ്പിള്‍ നല്‍കിയ പരാതിയിലാണ്. ക്വാല്‍കോം പ്രവര്‍ത്തിക്കുന്നത് അനധികൃതമായാണ് എന്നാണ് ആപ്പിള്‍ ആരോപിക്കുന്നത്. പേറ്റന്‍റുകളുടെ ലൈസന്‍സിലും ചിപ്പുകള്‍ സ്‍മാര്‍ട്ട്‍ഫോണ്‍ കമ്പനികള്‍ക്ക് കൈമാറുന്നതിലും പ്രശ്‍നങ്ങളുണ്ടെന്ന് ആപ്പിള്‍ പറയുന്നു. പണം നല്‍കാതെ ആപ്പിള്‍ തങ്ങളുടെ സാങ്കേതികവിദ്യ ഉപയോഗിക്കുകയാണെന്നാണ് ക്വാല്‍കോം പറയുന്നത്. 

ഏറ്റവും പുതിയ കോടതിവിധിയില്‍ നിരാശയുണ്ടെന്നാണ് ആപ്പിള്‍ പ്രതികരിക്കുന്നത്.