ഹിമാലയന്‍ ബൈക്കില്‍ ലോകംചുറ്റുന്ന വിദേശവനിത

ഹിമാലയന്‍ ബൈക്കില്‍ ലോകംചുറ്റുന്ന വിദേശവനിത

യൂറോപ്യന്‍ രാജ്യമായ നെതര്‍ലന്‍സില്‍ നിന്ന് ഇന്ത്യയില്‍ എത്തി, റോയല്‍ എന്‍ഫീല്‍ഡ്‍ അഡ്വഞ്ചര്‍ ബൈക്കായ ഹിമാലയന്‍ ഓടിച്ച് ലോകം ചുറ്റുന്ന ഒരു വനിതയാണ്  ഇച്ചി ബൂട്ട്‍സ്‍ (Itchy Boots) പ്രശ്സതമായ യൂട്യൂബ് ചാനലിന്‍റെ ഉടമ. 
ജോലി ഉപേക്ഷിച്ച് സ്വന്തമായുള്ളതെല്ലാം വിറ്റ് ലോകം കാണാന്‍ ഇറങ്ങിത്തിരിച്ച ഇവരുടെ പേര് നോറാലി എന്നാണ്. ഇന്ത്യയില്‍ തുടങ്ങിയ നോറയുടെ യാത്ര ഇപ്പോള്‍ അര്‍മീനിയയില്‍ എത്തിയിരിക്കുന്നു. യൂട്യൂബില്‍ 128,720 പേരാണ് നോറാലിയുടെ യാത്രകള്‍ സബ്‍സ്‍ക്രൈബ് ചെയ്‍തിട്ടുള്ളത്. 

സ്വര്‍ണഖനിയില്‍ ജോലി ചെയ്‍തിരുന്ന നോറാലി ഒരുതവണ ലോകം ചുറ്റി. കടത്തിലായപ്പോള്‍ വീണ്ടും ജോലി കണ്ടെത്തി പലരാജ്യങ്ങളിലായി ജോലിനോക്കി. ഒടുവില്‍ 2015ല്‍ ഒരു ഡ്യുക്കാട്ടി മോട്ടോര്‍സൈക്കിള്‍ വാങ്ങി. 2018ല്‍ ഇന്ത്യയില്‍ എത്തി റോയല്‍ എന്‍ഫീല്‍ഡിന്‍റെ ഹിമാലയന്‍ സ്വന്തമാക്കി. 

ഇന്ത്യയില്‍ നിന്ന് മ്യാന്മര്‍ വഴി മലേഷ്യയിലേക്കും അവിടെ നിന്ന് ഒമാനിലേക്കും ബൈക്ക് കടത്തി. പിന്നീട് യുഎഇ, ഇറാന്‍, തുര്‍ക്കെമനിസ്ഥാന്‍, ഉസ്‍ബകിസ്ഥാന്‍, തജിക്കിസ്ഥാന്‍, കിര്‍ഗിസ്ഥാന്‍, കസഖ്‍സ്ഥാന്‍, റഷ്യ, ജോര്‍ജിയ എന്നിവിടങ്ങളിലൂടെ യാത്ര തുടരുകയാണ് നോറാലി. 

15 മിനിറ്റോളം മാത്രം ദൈര്‍ഘ്യമുള്ള ചെറിയ വീഡിയോകളും സരസമായ അവതരണവുമാണ് ഇവരുടെ വീഡിയോകളുടെ പ്രത്യേകത. ഇന്ത്യയില്‍ നിന്നുള്ള ഒരു മോട്ടോര്‍സൈക്കിള്‍ ലോകം ചുറ്റാന്‍ ഉപയോഗിക്കുന്നു എന്നത് കൊണ്ട് നിരവധി ഇന്ത്യക്കാര്‍ നോറാലിയെ പിന്തുടരുന്നുണ്ട്. 

നോറാലിയുടെ ഹിമാലയന്‍ ബൈക്കിന് ബസന്തി എന്നാണ് അവര്‍ പേര് നല്‍കിയിരിക്കുന്നത്. ഇത്രയും ദൂരം താണ്ടിയിട്ടും കാര്യമായ പ്രശ്‍നങ്ങളൊന്നും ബൈക്കിന് സംഭവിച്ചിട്ടില്ലെന്നാണ് ഇവരുടെ അനുഭവം തന്നെ സാക്ഷ്യപ്പെടുത്തുന്നത്. ഇറാനില്‍ ഒരിടത്ത് വച്ച് ബൈക്ക് ബ്രേക്ക് ഡൗണ്‍ ആയതൊഴിച്ചാല്‍ ഹിമാലയന്‍ വളരെ സ്‍മൂത്ത് ആണ്. 

ലോകം മുഴുവന്‍ ചുറ്റി റോയല്‍ എന്‍ഫീല്‍ഡിന്‍റെ ഒരു അപ്രഖ്യാത അംബാസിഡര്‍ ആകുകയാണ് നോറാലിയെന്നാണ് അവരെ പിന്തുടരുന്നവരുടെ കമന്‍റുകള്‍. നോറാലിക്ക് യാത്ര തുടരാന്‍ റോയല്‍ എന്‍ഫീല്‍ഡ്‍ സഹായിക്കണമെന്നും കൂടുതല്‍പേര്‍ ആവശ്യപ്പെടുന്നുണ്ട്. 

റോഡിനും ഓഫ്-റോഡ‍്‍ റൈഡിങ്ങിനുമായി റോയല്‍ എന്‍ഫീല്‍ഡ് പുറത്തിറക്കിയ മോട്ടോര്‍ബൈക്കാണ് ഹിമാലയന്‍. അമേരിക്ക ഉള്‍പ്പെടെയുള്ള വിദേശ മാര്‍ക്കറ്റുകളിലേക്ക് കയറ്റി അയക്കപ്പെടുന്ന ഹിമാലയന്‍ ഏറ്റവും സ്വീകാര്യതയുള്ള എന്‍ഫീല്‍ഡ്‍ ബൈക്ക് കൂടിയാണ്.