മോദിയും എം.കെ സ്റ്റാലിനും; ടിവി എറിഞ്ഞുടച്ച് കമല്‍ഹാസൻ: വീഡിയോ

മോദിയും എം.കെ സ്റ്റാലിനും; ടിവി എറിഞ്ഞുടച്ച് കമല്‍ഹാസൻ: വീഡിയോ

ഉലക നായകൻ്റെ കലിപ്പ് വീഡിയോ വൈറലാകുന്നു. ലോക്സഭാ തെരഞ്ഞെടുപ്പുമായി ബന്ധപ്പെട്ട് ജനങ്ങൾക്കുള്ള ബോധ വത്കരണ പരിപാടിയിലാണ് കമഷഹാസൻ കോപാകുലനായി കാണപ്പെട്ടത്. ഈ തെരഞ്ഞെടുപ്പില്‍ കമല്‍ ഹാസൻ്റെ പാര്‍ട്ടിയായ മക്കള്‍ നീതി മയ്യത്തിൻ്റെ സ്ഥാനാര്‍ത്ഥികളും അങ്കത്തട്ടിൽ മാറ്റുരയ്ക്കുന്നുണ്ട്. 

ഇതിന് മുന്നോടിയായി താരം പുറത്തിറക്കിയ ഒരു വീഡിയോ ആണ് ഇപ്പോൾ സോഷ്യല്‍ മീഡിയയിലെ താരം. ടെലിവിഷന്‍ കണ്ടു കൊണ്ടിരിക്കുന്ന കമല്‍ഹാസന്‍ താത്പര്യമില്ലാതെ ചാനല്‍ മാറ്റി കൊണ്ടിരിക്കുന്നതാണ് വീഡിയോയുടെ തുടക്കം. അതിനിടെ പശ്ചാത്തലത്തിൽ പ്രധാനമന്ത്രി നരേന്ദ്ര മോദിയുടെയും എം.കെ സ്റ്റാലിൻ്റെയും പ്രസംഗങ്ങള്‍ മുഴങ്ങുന്നു. അത് കേട്ട് അസ്വസ്ഥനായി ഒടുവില്‍ ദേഷ്യത്തോടെ ടിവി എറിഞ്ഞുടയ്ക്കുന്ന കമല്‍ഹാസനെ ആണ് വീഡിയോയില്‍ കാണാനാകുന്നത്. കയ്യിലിരിക്കുന്ന റിമോട്ട് എറിഞ്ഞുടച്ച ശേഷമാണ് ടിവി നശിപ്പിക്കുന്നത്. 

ഒടുവിൽ ഒരുപിടി ചോദ്യങ്ങളും ജനങ്ങളോട് ഉന്നയിക്കുന്നുണ്ട് താരം. വോട്ട് ബോധപൂര്‍വ്വം വിനിയോഗിക്കേണ്ടതാണെന്നും നിങ്ങളുടെ വിജയത്തില്‍ താനും കൂടെയുണ്ടായിരിക്കുമെന്നും കമല്‍ വീഡിയോയിലൂടെ വ്യക്തമാക്കുന്നു. മക്കള്‍ നീതി മയ്യത്തിൻ്റെ നേതാവാണ് എങ്കിലും ഇത്തവണത്തെ തെരഞ്ഞെടുപ്പിൽ കമല്‍ മത്സരിക്കുന്നില്ല.