30 സെക്കന്‍റില്‍ ഒരു ചിത്രം; മനസ്സു തൊട്ട് 'ദേവിക'

30 സെക്കന്‍റില്‍ ഒരു ചിത്രം; മനസ്സു തൊട്ട് 'ദേവിക'

കേവലം 30 സെക്കന്‍റുകള്‍ കൊണ്ട് പറയാനുള്ള ആശയം വ്യക്തവും സ്പഷ്ടവുമായി പറഞ്ഞ് കൈയ്യടി നേടുകയാണ് ദേവിക എന്ന ഒരു കൊച്ചു മലയാള ചിത്രം. തൃശൂര്‍ സ്വദേശിയായ ഹിമല്‍ മോഹനും കൂട്ടുകാരുമാണ് ഈ ഹ്രസ്വചിത്രം ഒരുക്കിയിരിക്കുന്നത്. ഒരു പീഡനം. അതിനെതിരെയുള്ളൊരു പ്രതികാരം. അതാണ് ഈ ചെറുചിത്രം. 


30 സെക്കന്‍റുകൊണ്ട് ഇത്രയും ശക്തവും തീവ്രവുമായ ഒരു കഥ എങ്ങനെ ചുരുക്കി പറയാമെന്ന് തെളിയിച്ചിരിക്കുകയാണിവര്‍. ജിതിൻ ഐസക് തോമസിന്‍റേതാണ് കഥ. ഹിമല്‍ മോഹനാണ് ഛായാഗ്രഹണവും സംവിധാനവും നിര്‍വ്വഹിച്ചിരിക്കുന്നത്. എഡിറ്റിംഗും ഡിഐയും രോഹിത് വി.എസും സൗണ്ട് ഡിസൈൻ മിലൻ വിഎസും നിര്‍വ്വഹിച്ചിരിക്കുന്നു. 

 

സമൂഹ മാധ്യമങ്ങളിലും സിനിമാഗ്രൂപ്പുകളിലുമടക്കം ചിത്രം ഏറെ വൈറലായിരിക്കുകയാണ്. കഴിവുള്ള സംവിധായകന് 30 സെക്കന്‍റ് തന്നെ ധാരാളം എന്നാണ് ചിത്രത്തിന് പ്രശംസയുമായി വന്നിരിക്കുന്ന ഒരു കമന്‍റ്. ചിത്രത്തിന് ഇതിനകം നിരവധിപേര്‍ ലൈക്കുകളും ഷെയറുകളും കമന്‍റുകളുമാണ് ലഭിച്ചുകൊണ്ടിരിക്കുന്നത്.