വിനായകനെതിരെ സൈബര്‍ ആക്രമണം

വിനായകനെതിരെ സൈബര്‍ ആക്രമണം

കഴിഞ്ഞദിവസം ഒരു അഭിമുഖത്തിനിടയിൽ ബിജെപി വിരുദ്ധ പരാമര്‍ശം നടത്തിയ നടന്‍ വിനായകനെതിരെ സൈബര്‍ ആക്രമണം. ലോക്‌സഭാ തെരഞ്ഞെടുപ്പുഫലങ്ങളുമായി ബന്ധപ്പെട്ട് വിനായകന്‍ നടത്തിയ അഭിപ്രായപ്രകടനത്തിനെതിരെയാണ് വിമര്‍ശനം ഉയര്‍ന്നിരിക്കുന്നത്. അഭിമുഖത്തിനിടയിൽ ആര്‍എസ്‌എസിനും ബിജെപിക്കും കേരളത്തില്‍ വളരാൻ കഴിയുകയില്ലെന്ന് പറഞ്ഞതാണ് ബിജെപി അനുകൂലികള്‍ പൊക്കിക്കൊണ്ടുവന്നിരിക്കുന്നത്. 

ഇതേ തുടര്‍ന്ന് വംശീയമായും ജാതീയമായും താരത്തെ അധിക്ഷേപിച്ചുകൊണ്ടുള്ള പോസ്റ്റുകള്‍ സോഷ്യൽമീഡിയയിൽ നിറഞ്ഞിരിക്കുകയാണ്. വിനായകന്‍റേതായി ഇറങ്ങുന്ന സിനിമകള്‍ ബഹിഷ്‌കരിക്കാനടക്കം ആഹ്വാനം ചെയ്തിട്ടുമുണ്ടിവര്‍. 

'കേരളത്തില്‍ ഇക്കുറി എന്താണ് സംഭവിച്ചത് എന്നെനിക്ക് അറിയില്ല. കേരളത്തിലെ ജനങ്ങള്‍ ഇതേക്കുറിച്ച്‌ തീര്‍ച്ചയായും ചിന്തിക്കണം', തെരഞ്ഞെടുപ്പില്‍ കമ്മ്യൂണിസ്റ്റ് പാര്‍ട്ടി നേരിട്ട തോല്‍വിയെക്കുറിച്ച് ചോദിച്ചപ്പോള്‍ വിനായകൻ പറഞ്ഞതിങ്ങനെയായിരുന്നു. ബിജെപിയുടെയും സംഘപരിവാറിന്‍റേയും അജണ്ടയെ കേരളത്തിലെ ജനങ്ങള്‍ തള്ളിക്കളഞ്ഞതിലുള്ള സംതൃപ്തിയും അദ്ദേഹം പ്രകടിപ്പിച്ചുച്ചിരുന്നു. 

ഓൺലൈൻ മാധ്യമത്തിന് നൽകിയ അഭിമുഖം വൈറലായതിന് പിന്നാലെയാണ് വിനായകനെ ജാതീയവും വംശീയവുമായി അധിക്ഷേപിച്ചുകൊണ്ടുള്ള പോസ്റ്റുകള്‍ സോഷ്യൽമീഡിയയിൽ വന്നുതുടങ്ങിയത്. ഇതോടെ ഫേസ്ബുക്കിൽ വിനായകൻ ഇങ്ങനെയൊരു കുറിപ്പും പങ്കുവെച്ചിട്ടുണ്ട്.