ഇന്ത്യയിലെ ഏറ്റവും ചെറിയ കുഞ്ഞ് ജീവിതത്തിലേക്ക്...

ഇന്ത്യയിലെ ഏറ്റവും ചെറിയ കുഞ്ഞ് ജീവിതത്തിലേക്ക്...

ഇന്ത്യയിലെ ഏറ്റവും ചെറിയ നവജാത ശിശു ജീവിതത്തിലേക്ക്.ആ പെണ്‍കുട്ടി ജനിച്ചത് ഗര്‍ഭത്തിന്റെ 22-ാം ആഴ്ച്ചയില്‍ ആയിരുന്നു. ഭാരം വെറും 492 ഗ്രാം. ഇരട്ട സഹോദരന്‍ ആയ ശിശുവിന് 530 ഗ്രാം ആയിരുന്നു ഭാരം. അപ്പോള്‍ തന്നെ ഡോക്ടര്‍മാര്‍ വിധിച്ചു. കുട്ടികളെ രക്ഷിക്കാന്‍ സാധിക്കില്ല. 

കഴിഞ്ഞ ഒക്ടോബര്‍ 18ന് ആരംഭിച്ച ഒരു സാഹസികമായ ജീവന്‍ രക്ഷാപ്രവര്‍ത്തനം ഇപ്പോള്‍ ഫലവത്തായിരിക്കുകയാണ്. ജനിച്ച് നാല് ആഴ്ച്ചക്കുള്ളില്‍ ശ്വാസകോശം തകരാറിലായി ആണ്‍കുഞ്ഞ് മരിച്ചിരുന്നു. പിന്നീട് എല്ലാവരുടെയും ശ്രദ്ധ ജിയാന എന്ന പെണ്‍കുഞ്ഞിലായിരുന്നു. ഐസിയുവില്‍ ജീവിതത്തിനും മരണത്തിനും ഇടയില്‍ 102 ദിവസം പൊരുതി ഒടുവില്‍ ആ പെണ്‍കുഞ്ഞ് ജീവന്റെ കരയ്ക്ക് അടിഞ്ഞു. 

രക്ഷിതാക്കള്‍ ദിനലും രാഹുല്‍ മെഹ്തയും ആശ്വാസം കൊള്ളുന്നു. ജനുവരി 27ന് 1.8 കിലോഗ്രാം തൂക്കമുള്ള പെണ്‍കുഞ്ഞായി ജിയാന ആശുപത്രി വിട്ടു. മാര്‍ച്ച് മാസം ഒരിക്കല്‍ക്കൂടി ഡോക്ടര്‍മാര്‍ പരിശോധിച്ചപ്പോള്‍ 2.6 കിലോഗ്രാം ആണ് കുഞ്ഞിന്റെ ഭാരം. കുഞ്ഞ് ആരോഗ്യത്തോടെ ഇരിക്കുന്നു. 

ഇന്ത്യയിലെ ഇതുവരെയുള്ള കണക്കുകള്‍ അനുസരിച്ച് ഏറ്റവും നേരത്തെ ജനിക്കുകയും ജീവിതത്തിലേക്ക് തിരികെ വരുകയും ചെയ്ത ഏറ്റവും ഭാരംകുറഞ്ഞ കുഞ്ഞാണ് ജിയാന. 22 ആഴ്ച്ചയും 492 ഗ്രാം ഭാരവും ആണ് അവള്‍ക്കുണ്ടായിരുന്നത് - അഹമ്മദാബാദിലെ അര്‍പണ്‍ ന്യൂബോണ്‍ കെയര്‍ സെന്റര്‍ ഡയറക്ടര്‍ ഡോ. ആശിഷ് മെഹ്ത ടൈംസ് ഓഫ് ഇന്ത്യയോട് പറഞ്ഞു. 

ശ്വാസകോശത്തെ ശ്വസിക്കാന പഠിപ്പിച്ചു മരുന്നുകളും പോഷകവും നേര്‍ത്ത കുഴലിലൂടെ നല്‍കിയും ജിയാനയെ ജീവിപ്പിക്കുകയാണ് ഡോക്ടര്‍മാര്‍ ചെയ്തത്. കുട്ടിയുടെ പ്രതിരോധം പൂജ്യം ആയിരുന്നു. അത്രയ്ക്കും ശ്രദ്ധയോടെയാണ് കുഞ്ഞിനെ പരിപാലിച്ചത്. രണ്ട് തവണ ഗര്‍ഭം അലസിപ്പോയതിന് ശേഷമാണ് ദിനല്‍ പെണ്‍കുഞ്ഞിനെ ഗര്‍ഭം ധരിച്ചത്.