കല്ലട ബസിലെ അക്രമസംഭവം: മുഴുവന്‍ പ്രതികളും പിടിയിലായി

കല്ലട ബസിലെ അക്രമസംഭവം: മുഴുവന്‍ പ്രതികളും പിടിയിലായി

കല്ലട ബസില്‍ യുവാക്കളെ മര്‍ദ്ദിച്ച സംഭവത്തില്‍ മുഴുവന്‍ പ്രതികളും പിടിയിൽ. ഇതോടെ കേസില്‍ ഇതുവരെ അറസ്റ്റിലായവരുടെ എണ്ണം ഏഴായി. ബസ് ഉടമ ഉടന്‍ ഹാജരായില്ലെങ്കിൽ നിയമനടപടിയെന്ന് പൊലീസ് വ്യക്തമാക്കി. ആലുവ മജിസ്‌ട്രേറ്റിന് മുന്നിൽ ഹാജരാക്കിയ പ്രതികളെ 14 ദിവസത്തേക്ക് റിമാൻഡ് ചെയ്തു. ഇവരെ എറണാകുളം സബ് ജയിലിലേക്ക് മാറ്റി. 

യാത്രക്കാരെ മര്‍ദ്ദിച്ച കല്ലട ബസിലെ ജീവനക്കാര്‍ക്കെതിരെ നേരത്തേ വധശ്രമത്തിന് കേസെടുത്തു. സുരേഷ് കല്ലട ബസിലെ ജീവനക്കാരാണ് യാത്രക്കാരെ ക്രൂരമായി മര്‍ദ്ദിച്ചത്. ഇവര്‍ക്കെതിരെ വധശ്രമം, മോഷണം എന്നീ കുറ്റങ്ങളാണ് ചുമത്തിയിരിക്കുന്നത്. അക്രമസംഭവങ്ങളില്‍ ഉള്‍പ്പെട്ട രണ്ട് പേരെക്കൂടി പോലീസ് ഇന്ന് കസ്റ്റഡിയിലെടുത്തിരുന്നു. 

അതേസമയം യാത്രക്കാരെ മര്‍ദ്ദിച്ച സംഭവത്തില്‍ സ്വകാര്യ ബസ് സര്‍വ്വീസ് ഗ്രൂപ്പായ കല്ലട ഖേദം രേഖപ്പെടുത്തി. യാത്രക്കാരെ ബസ് ജീവനക്കാര്‍ ആക്രമിച്ചതായി കല്ലട സമ്മതിച്ചു. വൈറ്റിലയില്‍ ആക്രമണം നടന്നിട്ടുണ്ട്. എന്നാല്‍ ജീവനക്കാര്‍ക്ക് നേരെയും ആക്രമണമുണ്ടായതായി കല്ലട വിശദീകരിക്കുന്നു. 

ഇതിനിടെ കല്ലട ഗ്രൂപ്പിന് എതിരെ കര്‍ശന നടപടിയെടുത്ത് പോലീസ് രംഗത്തെത്തിയിരുന്നു. കൊച്ചിയിലെ കല്ലട ഗ്രൂപ്പ് ഓഫീസ് പോലീസ് അടച്ചുപൂട്ടി. അനധികൃതമായി പാഴ്‍സല്‍ കൈമാറ്റം നടത്തുന്നതായി കണ്ടെത്തിയതിനെ തുടര്‍ന്നാണ് നടപടി.മൂന്ന് യുവാക്കളെ ബസ്സില്‍ നിന്ന് മര്‍ദ്ദിച്ച് ഇറക്കിവിട്ട സംഭവത്തില്‍ തെളിവ് ശേഖരിക്കാനാണ് പോലീസ് വൈറ്റിലയിലുള്ള കല്ലട ഗ്രൂപ്പ് ബുക്കിങ് ഓഫീസില്‍ എത്തിയത്. ഇതിനിടയിലാണ് ഇവിടെ നിന്ന് സംശയാസ്‍പദമായ സാഹചര്യത്തില്‍ പാഴ്‍സലുകള്‍ കടത്തുന്നത് ശ്രദ്ധയില്‍പ്പെട്ടത്. 

തിരുവനന്തപുരത്തു നിന്ന് ബെംഗലൂരുവിലേക്ക് പോകുകയായിരുന്നു സുരേഷ് കല്ലട ഗ്രൂപ്പിന്‍റെ ഉടമസ്ഥതയിലുള്ള ബസ് തകരാറിലായത് സംബന്ധിച്ച് ഉണ്ടായ തര്‍ക്കത്തിനെ തുടര്‍ന്നാണ് ബസ് ജീവനക്കാര്‍ യാത്രക്കാരെ മര്‍ദ്ദിച്ചത്.