നിറങ്ങളുടെ ഉത്സവം കാണാം ഉത്തരേന്ത്യയില്‍ രാജകീയമായി

നിറങ്ങളുടെ ഉത്സവം കാണാം ഉത്തരേന്ത്യയില്‍ രാജകീയമായി

ജീവിതകാലം മുഴുവന്‍ ഓര്‍മ്മയില്‍ തങ്ങി നില്‍ക്കുന്ന നിമിഷങ്ങള്‍ക്കായി ഹോളി ദിനം ചെലവിടാന്‍ പറ്റിയ ചില സ്ഥലങ്ങള്‍ ഇതാ...

 

ജോധ്പൂര്‍

സൂര്യനഗരമെന്നും നീല നഗരമെന്നും വിളിക്കപ്പെടുന്ന രാജസ്ഥാന്‍ ജില്ലയാണ് ജോധ്പൂര്‍. തെളിഞ്ഞ സൂര്യപ്രകാശമെപ്പോഴും ലഭിക്കുന്നതിനാല്‍  ജോധ്പൂരിന് 'സൂര്യനഗരം' എന്നും പേരുണ്ട്. മെഹറാന്‍ഗാര്‍ഗ് കോട്ടയ്ക്കു ചുറ്റുമുള്ള നീലച്ചായമടിച്ച വീടുകള്‍ കാരണം 'നീലനഗരം' എന്നും ജോധ്പൂരിനെ വിളിക്കുന്നു. 

ലോകത്തിലെ ഏറ്റവും സുന്ദരമായ ഹോട്ടല്‍ സമുച്ചയമായ ഉമൈദ് ഭവന്‍ പാലസ് ഇവിടെയാണ്‌ സ്ഥിതി ചെയ്യുന്നത്. ജോധ്പൂര്‍ രാജകുടുംബം താമസിക്കുന്നത് ഇവിടെയാണ്. 1943ല്‍ നിര്‍മിച്ച ഈ ഹോട്ടല്‍ ജോധ്പൂര്‍ രാജകുടുംബത്തിന്‍റെ കൊട്ടാരമായിരുന്നു. 347 മുറികളുള്ള കൊട്ടാരത്തിലെ 64 മുറികള്‍ പിന്നീട് വിനോദസഞ്ചാരികള്‍ക്കായി തുറന്നു കൊടുക്കുകയായിരുന്നു. പാലസിന്‍റെ ഒരു ഭാഗം കൈകാര്യം ചെയ്യുന്നത് താജ് ഹോട്ടൽസ്‌ ഗ്രൂപ്പ് ആണ്. 

ഇപ്പോഴത്തെ ഉടമസ്ഥനായ ഗജ് സിംഗിന്‍റെ മുത്തച്ഛനായ മഹാരാജ ഉമൈദ് സിംഗിന്‍റെ പേരാണ് പാലസിനു നൽകിയിരിക്കുന്നത്. പാലസിന്‍റെ ഒരു ഭാഗം മ്യൂസിയമായും പ്രവർത്തിക്കുന്നുണ്ട്.

ഇവിടത്തെ ഹോളി ആഘോഷത്തില്‍ രണ്ടു ദിവസം രാജകുടുംബത്തോടൊപ്പം പങ്കെടുക്കാം. ഇതിനായി രാജകുടുംബവുമായി ബന്ധമൊന്നും വേണമെന്നില്ല. ഹോളിയുടെ തലേ ദിവസം രാത്രിയില്‍ തുറസ്സായ സ്ഥലത്ത് തീ കൂട്ടിയാണ് ആഘോഷങ്ങള്‍ തുടങ്ങുന്നത്. മയിലുകള്‍ നിറഞ്ഞ കൊട്ടാരത്തിന്‍റെ പരിസര പ്രദേശത്ത് വര്‍ണ്ണങ്ങളും പാട്ടും നൃത്തവുമായി ഹോളി ആഘോഷിക്കാന്‍ ആഗ്രഹമുള്ളവര്‍ക്ക് ഇപ്പോള്‍ പറ്റിയ സമയമാണ്.

 

ഉദയ്പൂര്‍ 

രാജസ്ഥാനിലെ ലേക് സിറ്റി എന്നാണ് ഉദയ്പൂര്‍ അറിയപ്പെടുന്നത്. നിരവധി തടാകങ്ങള്‍ ഇവിടെ ഉണ്ടെങ്കിലും പിച്ചോള തടാകമാണ് ഇതില്‍ പ്രധാനം. ഈ തടാകത്തിന്‍റെ തീരത്താണ് ലേക്ക് പാലസ് സ്ഥിതിചെയ്യുന്നത്.  രാജസ്ഥാനിലെ ഉദൈപുർ ഭരിച്ചിരുന്ന മഹാറാണ ജഗത് സിംഗ് രണ്ടാമൻറെ (മേവാർ രാജവംശത്തിലെ 62-മത്തെ രാജാവ്‌) നിർദ്ദേശപ്രകാരം മധ്യ വേനൽ കൊട്ടാരമായി ഉപയോഗിക്കാൻ 1743നും 1746നും ഇടയിൽ നിർമിച്ചതാണ് ലേക്ക് പാലസ്. ഇന്ത്യയിലേയും ലോകത്തിലേയും ഏറ്റവും റൊമാന്റിക് ആയ ഹോട്ടലായി ലേക്ക് പാലസ് തെരഞ്ഞെടുക്കപ്പെട്ടിട്ടുണ്ട്.